მადრიდის "რეალის” ყოფილი ფეხბურთელი და ყველა დროის ერთ-ერთი საუკეთესო მარცხენა მცველი, რობერტო კარლოსი, რადიო MARCA – ს იმისთვის ეწვია, რომ "ანჟის” მოთამაშე მწვრთნელად დანიშვნის შესახებ ესაუბრა, თუმცა ინტერვიუს დროს მრავალ თემას შეეხო.

"გასულ კვირას ნეიმარს ვესაუბრე და ვუთხარი: შეწყვიტე ეს სისულელე და წადი მადრიდში. მასაც ვიცნობ და მის მშობლებსაც, ისინი ძალიან კარგი ადამიანები არიან. საქმე ისაა, რომ ბრაზილიაში მას პოპ ვარსკვლავივით ექცევიან. და ზოგჯერ ბევრ რამეს ბლოკავენ”.

"ნეიმარი "სანტოსში” გამორჩეულია, როგორც კრიშტიანუ "რეალში” ან მესი "ბარსელონაში”. გარდა ამისა, ძალიან მაღალ თანხებზე ვსაუბრობთ. მაგრამ იმედი მაქვს, იანვარში მას თეთრი მაისურით ვიხილავ”.

"კაკა სრულყოფილია. უკანასკნელ მატჩებს მაღალ დონეზე ატარებს. ძალიან გახარებული ვარ, რადგან ვიცი, რას განიცდიდა. ის ფენომენალურია, უბრალოდ, გარკვეული პრობლემები უშლიდა ხელს პოტენციალის სრულად გამოვლენაში”.

"რა შემიძლია ვთქვა ლეო მესიზე? არაფერი, მას მხოლოდ უნდა უყურო და ტაში დაუკრა”.

"ანჟის” მთავარი მწვრთნელობა ჩემთვის მეორეხარისხოვანია, რადგან ფეხბურთის თამაშით კვლავ სიამოვნებას ვიღებ. გარდა ამისა, ამ პროფესიის ადამიანების ცხოვრება ძალზე რთულია. მომავალში საკუთარ თავს მადრიდში, მოსკოვსა და სან პაულოში ვხედავ. ალბათ, მწვრთნელობასაც უფრო სერიოზულად მოვკიდებ ხელს”.

"ამაღამ პრეზიდენტთან სადილზე ვარ მიწვეული. მომავალი სეზონის ტრანსფერები უნდა განვიხილოთ. მაგალითად, ჯერარდი, ლამპარდი, პირესი… რაც შეეხება მწვრთნელებს, აქ კაპელოს, ჰიდინკის, ლუშემბურგოს, სკოლარის და სხვათა სახელები ფიგურირებს”.